Tsh. 43 milioni zatolewa kwa wajasiliamali Ushetu.

Ilipo tumwa: October 18th, 2019

Halmashauri ya wilaya ya Ushetu, imetoa kiasi cha fedha Tsh. 43,000,000/= ikiwa ni fedha ambazo zimekopeshwa kwa vikundi mbalimbali vya Wajasiliamali ili kuwawezesha kiuchumi. Jumla ya vikundi Kumi na Kimoja (11), ambavyo vimegawanyika katika makundi ya Vikundi vya Wanawake, Vikundi vya Vijana, na Kikundi cha Watu wenye Ulemavu Vimenufaika na uwezeshwaji huo.

Tukio hilo limefanyika leo tarehe 18 Oktoba, 2019, katika ukumbi wa Mikutano wa Halmashauri ya Wilaya ya Ushetu uliopo eneo la Nyamilangano.

Akizungumza wakati wa utoaji wa fedha hizo za mikopo kwa wajasiliamali, Mratibu wa Dawati la Uwezeshaji wananchi Kiuchumi, Bi. Minael John Ngomoi, amewataka wajasilimali hao kufanya kazi kwa Weledi mkubwa na kuwa na Ushrikiano wa dhati ili kuweza kufikia Malengo ya pamoja  na kuweza kurejesha fedha hizo za mikopo kwa wakati.

Katika hatua nyingine, afisa biashara wa Halmashauri ya Ushetu, Bi. Beatrice Masesa, amewataka wana vikundi hao kuangalia fursa za biashara zilizopo katika maeneo yao ili wazitumie ipasavyo ili kupata tija kiuchumi katika shughuli zao.